يا شاب يابو السلسله
متعلقة ومتدلدله
أصبحت بنت مقطقطه
ما تلم نفسك يا ولا
لابس بلوزه منقطه
ألوانها زاهية مزركشه
وأمك وأبوك من فقرهم بيبيتوا من غير عشا
شعرك طويل ومسبسبه
زي البنات ومسيبه
والناس يشوفوا قصتك
يستعجبوا ويستغربوا
الجزمه عليت كعبها
وأختك بتلبس زيها
والفرق بينكوا ما اختفي
وانت بتمشي جنبها
البنطلون بتحزقه
ومصغره ومضيقه
وحزام ف وسطك تلبسه
والتوكه فيه بتزوقه
عاملي هيبز يا غبي
وصبحت ديل للأجنبي
ابكي يا مصر وولولي
واستعجبي واستغربي
بكفايه واسكت يا ألم
ده النفس فاض بيها الألم
ده صنف عمره ما يختشي
ولا نصح يجدي في الصنم