يوم وداعك جاك
رفع صحابي المناديل ، و شاوروا
... و يفطة مستنياك
آخر حروف عطشانه بالأمنيات
آخر حروف بتطوف و أسيانه
في كل دكانه .. بكا و عياط
في كل شارع فانوس مطفي
موكب من الجدود ماشي ف سكات
موكب لأصحاب شفتهم .. في الحلم أو في الحياة
موكب طويل ... ياه
(دياب ) أبويا في بدايته ما يلتفت لي
بانده عليه .. بيغشش الرؤية ف عنيه .. دمع نازل طوفان
و ابن عمي ( زوزو ) بيبتسم كالعادة مات في عز الشباب
و راسه مرتاحة ع الوسادة يبص ناحية راسي و يسهم
أنا ... مش قادر أتكلم
طاهر بياخد راس الموكب اللي معدي ... و يدندن ...
و احنا ... عقولنا مليانه حكمة
لكن مكسورة جوانا الأغاني
